«Бабалар ізімен» – ұлттық рухты жаңғыртатын жаңа жоба

Подробности: Категория: Последний номер; Создано 10.07.2025 09:54; Автор: Майра Дүзбайқызы; Просмотров: 79

Маусым айында Қамысты ауданында бұрын-соңды болмаған ерекше бастама – «Бабалар ізімен» атты тың жоба өз жорығын бастады.
Бұл рухани экспедицияның басты мақсаты – халқымыздың салт-дәстүрін, сал-серілік өнерін, ұлттық құндылықтарды насихаттау және жастарға үлгі болу. Жоба аясында өнерпаздар бес атпен жолға шығып, Қамыстыдан бастап өңірдің бірнеше аудан-қалаларын аралады. Қатысушылардың қатарында ақын, термеші, әнші, жалпы шығармашыл азаматтар бар. Олар жол бойындағы киелі орындарға, зираттарға тоқтап, бабалар рухына тағзым етіп, құран бағыштайды. Сонымен қатар әрбір елді мекенде жергілікті халықпен жүздесіп, рухани кештер өткізіп, ұлттық өнерді насихаттайды. Жалпы жоба аясында өнерпаздар екі қала мен бес ауданды аралап, дала төсінде салт атпен жүріп өтіп, қазақ даласының сұлулығын да, өнері мен дарқан көңілін, салт-дәстүрін паш етті.
- Бұл бастама халқымыздың бай мұрасын ұлықтауға бағытталған ерекше форматтағы сапар Домбыра күнімен де үйлесіп отыр. Қамысты ауданының 70 жылдығына орай тапсырыспен дайындалған домбыралар өнерлі азаматтарға тарту етіледі. Егер биылғы сапар сәтті өтсе, келер жылы Арқалық, Аманкелді, Жанкелдин аудандарына жол тартпақпыз, – дейді жоба жетекшісі, Қамысты аудандық мәдениет үйінің директоры Еркебұлан Кәрімұлы.
30 маусым күні Қамыстыдан шыққан бес атпен жолға шыққан өнерпаздар керуені алдымен Денисов ауданына жетіп, сол жерде киіз үй тігіліп, ұлттық тағамдар ұсынылып, салтанатты кездесу өтеді. Одан кейінгі күні Лисаков қаласына аялдап, Бейімбет Майлин ауданына ат басын тіреді. Жабағы батыр ескерткіші жанында аудан басшылары қарсы алды. Қасиетті топыраққа табан тиген керуенші өнерпаздар бабалар аруағына тағзым етіп, Журавлев ауылындағы қорымда орналасқан, аты аңызға айналған Жабағы батыр Ипанұлының жерленген жеріне келіп құран бағыштады. Көне тарих пен киелі табиғаттың үніндей сыр шертетін Әйет ауылындағы табиғат аясында орналасқан мөлдір бұлақ басына да арнайы барып, таза табиғаттың кәусарынан дәм татты. Бұлақтың сыңғырлаған үні мен айнала табиғаттың көркі келген меймандарға ерекше әсер сыйлады. Бұл сәт те ұлттық болмыстың бір бөлігі ретінде жүректерде жатталып қалды. Аудандық Елубай Өмірзақов атындағы Мәдениет үйі өнерпаздары кезекті мәрте ұлттық рухты ұлықтаған игі шараның куәсі болды. Олар өнер сапарымен ат басын тіреген қонақ өнерпаздарға ерекше құрмет көрсетіп, қазақ халқының бай мұрасы мен қонақжайлығын паш ету мақсатында ақ дастархан жайылып, ұлттық тағамдар ұсынылды. Келген қонақтар алдымен дәстүрлі сән-салтанатпен қарсы алынып, жоралғылар орындалды. Сапар соңында Қамысты ауданының 70 жылдығына орай қасиетті домбыра өнерпаз жігіттердің бірі Қабылдин Айбек Қуантайұлына естелік ретінде табыс етілді. Өнерпаздар мен қонақтар жарыса күй тартты. Қонақтар аудан өнерпаздарының ықыласына ризашылықтарын білдіріп, мәдени байланыстың мұндай қадамдары ел бірлігін бекемдейтінін атап өтті. Осындай іс-шаралар ұлттық рухты жаңғыртып, ел ішіндегі татулық пен өнерге деген құрметті арттырары сөзсіз.